Təbii fəlakətlər gözlənilməz olduğu üçün, eyni zamanda dəhşətli nəticələri ilə bəşəriyyəti hər zaman qorxu içərisində saxlayıb. Zəlzələlərin, çay daşqınlarının, torpaq sürüşməsinin, vulkan püskürməsinin, sunaminin, qasırğanın qorxulu tərəfi həm də odur ki, bu fəlakətlərin qarşısını ala biləcək nə elm, nə də texnika mövcud deyil. 2023-cü il fevralın 6-da yerli vaxtla saat 04:17-də qardaş Türkiyədə baş verən dəhşətli zəlzələ nəticəsində çoxlu sayda insan tələfatının olması ölkəmizdə böyük hüznlə qarşılandı. Qardaş ölkədən gələn acı xəbər Azərbaycan xalqını və dövlətini dərin kədərə boğdu. Baş verən zəlzələdən sonra dövlət və millət olaraq səfərbər olduğumuz göz önündədir. Bu da təbiidir. Çünki zəlzələnin aldığı canlar bizim öz canlarımızdır. Azərbaycan bu çətin zamanlarda da qardaş ölkənin köməyinə çatan ilk ölkə oldu.
Dövlət başçımız cənab İlham Əliyevin Türkiyədə baş verən dəhşətli zəlzələdən dərhal sonra Türkiyənin Prezidenti Rəcəb Tayyib Ərdoğana başsağlığı məktubu ünvanlaması, daha sonra zəng edərək bu ağır məqamda hər cür yardım göstərməyə hazır olduğumuzu bildirməsi, eləcə də fevralın 8-də Türkiyə Respublikasının ölkəmizdəki səfirliyində olması, başsağlığı verməsi əsl qardaşlığın təzahürüdür. Möhtərəm Prezidentimiz İlham Əliyevin dediyi kimi: “Azərbaycan hər zaman olduğu kimi, ilk dəqiqələrdən qardaş Türkiyənin yanında idi və öz dəstəyimizi, öz həmrəyliyimizi həmişə olduğu kimi nümayiş etdirdik. Qardaş Türkiyədə baş verən dağıdıcı zəlzələnin fəsadlarının aradan qaldırılması məqsədilə bu ölkəyə ilk yardım əlini uzadan məhz Azərbaycan oldu. Bundan başqa cür də ola bilməzdi. Çünki Azərbaycan və Türkiyə iki dost, qardaş, canı, qanı bir ölkələrdir”.
Azərbaycan Respublikasının Prezidenti İlham Əliyevin göstərişinə əsasən 8 fevral tarixdən etibarən Türkiyəyə ezam olunmuş Azərbaycan Ordusunun hərbi tibb personalı Kahramanmaraşda fəaliyyətə başlayıb. Ümumilikdə 20 nəfərlik hərbi tibb personalı baş vermiş zəlzələdə xəsarət alan insanlara tibbi yardımın göstərilməsi məqsədilə hadisənin ilk saatından etibarən qardaş ölkəyə ezam olunub. Zəlzələnin fəsadlarının aradan qaldırılması və axtarış-xilasetmə əməliyyatlarına dəstək məqsədilə Fövqəladə Hallar Nazirliyinin çevik xilasetmə qüvvələri də qardaş ölkəyə yola düşüb. Cənab İlham Əliyevin göstərişinə əsasən, zəlzələdən zərər çəkən insanlara dəstək məqsədilə həyata keçirilən yardım tədbirləri davam edir.
Azərbaycan Respublikasının Birinci vitse-prezidenti Mehriban xanım Əliyeva fevralın 6-da Türkiyədə baş vermiş zəlzələ ilə əlaqədar rəsmi instaqram səhifəsində paylaşım edib. Paylaşımda bildirilir: "Türkiyənin cənub-şərqində baş vermiş güclü zəlzələnin nəticələri barədə xəbərləri dərin kədər hissi ilə qarşıladım. Allah faciə zamanı həlak olanlara rəhmət eləsin. Onların doğmalarına və yaxınlarına dərin hüznlə başsağlığı verirəm. Yaralananların və xəsarət alanların tezliklə şəfa tapmasını arzulayıram. Uca Tanrıdan bütün Türkiyə xalqına güc və səbr diləyirəm". Eyni zamanda zəlzələ qurbanlarına dəstək məqsədilə Azərbaycanın birinci xanımı, Heydər Əliyev Fondunun Prezidenti Mehriban xanım Əliyevanın göstərişinə əsasən, Heydər Əliyev Fondu tərəfindən də qardaş ölkəyə humanitar yardım göndərilib. Fondun zəlzələ bölgəsinə ezam olunan əməkdaşları humanitar yardımı Türkiyənin faciə bölgəsində zərər çəkmiş vətəndaşlara çatdırıblar.
Ölkəmizin bir çox bölgələrindən vətəndaşlarımız Türkiyədə baş vermiş güclü zəlzələdən zərər çəkənlərə yardım kampaniyasına qoşulub. Qeyri-sabit hava şəraitinə baxmayaraq, müxtəlif şəhər və rayonlarında yaşayan sakinlər axın-axın təşkil olunan yardım toplama məntəqələrinə gəlir, gətirdikləri əşyaları aidiyyəti üzrə məsul şəxslərə, könüllülərə təhvil verirlər. Samux rayonu da öz növbəsində qardaş ölkə üçün humanitar yardım kampaniyasına qoşulub.
Bu gün dağılmış evlərin altında Türkiyə və Azərbaycanın ayrılmaz qardaş kimi çiyin-çiyinə dayanaraq dağıntılar altında çarəsiz qalmış insanları xilas etməsinin şahidi oluruq. Qardaş ölkənin uğuruna birgə sevindiyimiz kimi, kədərinə də birgə acıyırıq. Tarixən ağır sınaqlara məruz qalmış qardaş Türkiyənin bu ağır günləri də adlayacağı şübhəsizdir. Bütün təhdidlər kimi baş verən zəlzələ də qüdrətli Türkiyə dövlətini, bütöv və böyük türk xalqını sarsıda bilməz. Başın sağ olsun,Türkiyə! Canımızla, qanımızla, son nəfəsimizədək yanındayıq!
Namizəd İsmayılov,
Qaradağ Rayon Mənzil Kommunal Təsərrüfatı Birliyinin rəisi.
